Мирзоқосим Каримзода

 Соли 2006 ва соли 2011 Донишгоҳи давлатии ҳуқуқ, бизнес ва сиёсати Тоҷикистонро бо ихтисосҳои муносибатҳои байналмилалӣ ва ҳуқуқшиносӣ хатм кардааст. Номзади илмҳои таърих буда, ба забонҳои русӣ, форсӣ ва арабӣ озодона сухан мегӯяд. Бо Ифтихорномаи Ҳукумати Ҷумҳурии Тоҷикистон сарфароз гардонида шудааст.

Фаъолияти меҳнатии худро соли 2004 оғоз намуда, солҳои 2004–2006 ҳамчун мутахассиси Идораи кор бо ҷавонони вилояти Суғд фаъолият кардааст. Солҳои 2006–2007 мутахассиси шуъбаи кор бо ҷавонони Кумитаи иҷроияи Ҳизби Халқии Демократии Тоҷикистон дар шаҳри Хуҷанд буд.

Солҳои 2007–2008 дар вазифаи ассистент ва омӯзгори кафедраи муносибатҳои байналмилалии Донишгоҳи давлатии ҳуқуқ, бизнес ва сиёсати Тоҷикистон фаъолият намудааст. Дар солҳои 2008–2009 ҳамчун омӯзгори кафедраи таърихи халқи тоҷик ва фанҳои ҷамъиятии ҳамин донишгоҳ фаъолият кардааст. Солҳои 2009–2011 ходими илмии Маркази илмӣ-тадқиқотӣ ва методии «Тоҷикистон: таърих, сиёсат ва замони муосир»-и Донишгоҳи давлатии ҳуқуқ, бизнес ва сиёсати Тоҷикистон буд.

Солҳои 2011–2012 ба ҳайси дотсенти кафедраи таърихи халқи тоҷик ва солҳои 2012–2014 ҳамчун дотсенти кафедраи муносибатҳои байналмилалии Донишгоҳи давлатии ҳуқуқ, бизнес ва сиёсати Тоҷикистон фаъолият кардааст.

Аз 12 июли соли 2014 то 12 апрели соли 2018 вазифаи мудири шуъбаи рушди иҷтимоӣ ва робита бо ҷомеаи дастгоҳи Раиси шаҳри Хуҷандро ба уҳда дошт.

Аз 12 апрели соли 2018 то августи соли 2023 дар вазифаи сардори Раёсати кор бо ҷавонон ва варзиши вилояти Суғд фаъолият намуд.

Аз 7 августи соли 2023 то 18 декабри соли 2024 Раиси Кумитаи иҷроияи Ҳизби Халқии Демократии Тоҷикистон дар вилояти Суғд буд.

Аз 18 декабри соли 2024 то имрӯз дар вазифаи Муовини Раиси Ҳизби Халқии Демократии Тоҷикистон фаъолият мекунад.

Оиладор буда, дар шаҳри Хуҷанд зиндагӣ мекунад.