3 августи соли ҷорӣ бо ташаббуси Кумитаи иҷроияи марказии Ҳизби Халқии Демократии Тоҷикистон дар бинои Кумитаи иҷроияи марказии ҳизб бахшида ба қабули қатъномаи навбатии Маҷмаи Умумии Созмони Милали Муттаҳид бо ташаббуси Ҷумҳурии Тоҷикистон оид ба эълон гардидани 31 август ҳамчун Рӯзи байналмилалии зеҳни сунъӣ, ҳамоиши ҳизбӣ таҳти унвони «Ташаббусҳои ҷаҳонии Пешвои миллат – роҳнамои рушди устувор» баргузор гардид.

Дар ҳамоиш муовини раиси Ҳизби Халқии Демократии Тоҷикистон Каримзода Мирзоқосим, муовини якуми директори Агентии инноватсия ва технологияҳои рақамии назди Президенти Ҷумҳурии Тоҷикистон Ҳаким Исломзода, муовини якуми директори Хадамоти алоқаи назди Президенти Ҷумҳурии Тоҷикистон Парвиз Нориён, доктори илмҳои иқтисод, корманди Академияи миллии илмҳои Тоҷикистон Раҳимзода Шариф, Академики Академияи миллии илмҳои Тоҷикистон Маҳмадшо Илолов инчунин аъзо ва ҷонибдорони ҳизб иштирок намуда, доир ба аҳамияти ташаббуси мазкур ва нақши он дар рушди соҳаи зеҳни сунъӣ андешаҳои худро баён карданд.

Ҳамоишро муовини раиси Ҳизби Халқии Демократии Тоҷикистон Каримзода Мирзоқосим ифтитоҳ намуда, зикр кард, ки ташаббуси мазкур бозгӯи сиёсати маорифпарварона ва дурбинонаи Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон буда, аз таваҷҷуҳи пайвастаи роҳбарияти давлат ба рушди илму дониш, техника ва технологияҳои муосир шаҳодат медиҳад.

Ҳамзамон, таъкид гардид, ки қабули қатъномаи мазкур нақши фаъол ва созандаи Ҷумҳурии Тоҷикистонро дар ташаккули рӯзномаи байналмилалӣ вобаста ба истифодаи масъулона ва самараноки зеҳни сунъӣ ва технологияҳои навин боз ҳам тақвият мебахшад.

Лозим ба ёдоварист, ки маориф ва илм яке аз самтҳои афзалиятноки сиёсати давлатии Ҷумҳурии Тоҷикистон ба ҳисоб рафта, дар кишвар барои рушди муассисаҳои таълимӣ, таҳкими заминаи моддию техникӣ, омодасозии кадрҳои соҳибихтисос, густариши таҳқиқоти илмӣ ва ҷорӣ намудани технологияҳои муосир шароити мусоид фароҳам оварда шудааст.

Дар маҷмӯъ, ташаббусҳои ҷаҳонии Ҷумҳурии Тоҷикистон таҳти роҳбарии Пешвои миллат, муҳтарам Эмомалӣ Раҳмон ба ҳалли масъалаҳои муҳимми ҷаҳонӣ, таҳкими ҳамкориҳои байналмилалӣ, истифодаи имкониятҳои илму технология ва таъмини рушди устувор равона гардида, мавқеи созанда ва масъулиятшиносонаи кишварро дар арсаи байналмилалӣ бозгӯ менамоянд.