28-уми августи соли равон бо ибтикори Кумитаи иҷроияи марказии Ҳизби Халқии Демократии Тоҷикистон ва Ташкилоти ҷамъиятии ҷавонон «Созандагони Ватан» форуми ҷумҳуриявии ҷавонон таҳти унвони «Истиқлолият, ҷавонӣ ва созандагӣ» баргузор гардид.

Дар ҳамоиш муовини якуми Раиси ҲХДТ Маликшо Неъматзода, мудири шуъбаи ИДМ-и Институти омӯзиши масъалаҳои давлатҳои Осиё ва Аврупои АМИТ Зафар Сайидзода, раиси ТҶҶ «Созандагони Ватан», инчунин намояндагони фаъоли ин созмон аз вилоятҳо ва шаҳру ноҳияҳои кишвар иштирок намуданд.

Барномаи форум бо боздиди дастаҷамъонаи иштирокчиён аз «Осорхонаи Ҳизби Халқии Демократии Тоҷикистон» оғоз ёфт. Пас аз шиносоӣ бо фаъолияти ҳизбӣ ва таърихи он, дар маҷлисгоҳи КИМ ҲХДТ ҷаласаи тантанавӣ доир гардид.

Чорабиниро муовини якуми Раиси Ҳизби Халқии Демократии Тоҷикистон Маликшо Неъматзода ифтитоҳ намуда, зимни суханронии худ дастовардҳои ҷавононро дар даврони соҳибистиқлолӣ таъкид кард. Мавсуф қайд намуд, ки Асосгузори сулҳу ваҳдати миллӣ – Пешвои миллат, муҳтарам Эмомалӣ Раҳмон пайваста ба насли ҷавон ғамхории падарона зоҳир намуда, барои рушду камолоти онҳо тамоми шароити мусоидро фароҳам овардаанд. Дар идома суханони Пешвои миллат ёдоварӣ шуд: «Шумо – ҷавонон бояд пайгирона омӯзед ва эътимод пайдо намоед, ки миллати тоҷик яке аз халқҳои қадимтарини ҷаҳон аст. Инро фарҳангу таърихи ориёӣ ва гузаштаи миллати куҳанбунёди тоҷик собит месозад».

Сипас, мудири шуъбаи ИДМ-и Институти омӯзиши масъалаҳои давлатҳои Осиё ва Аврупои АМИТ Зафар Сайидзода суханронӣ карда, ҷавононро неруи пешбаранда ва ояндасози ҷомеа арзёбӣ намуд.

Дар қисмати дигари чорабинӣ роҳбарони намояндагиҳои ТҶҶ «Созандагони Ватан» дар ВМКБ, вилоятҳои Хатлону Суғд, шаҳри Душанбе ва минтақаи Рашт гузориш доданд. Дар фарҷоми бахши расмӣ, як гурӯҳ иштирокчиёни фаъол бо сипоснома ва туҳфаҳои хотиравӣ қадрдонӣ шуданд.

Дар доираи барномаи фарҳангию маърифатии форум, иштирокчиён аз «IT-Park»-и Душанбе, бинои нави Парлумони Тоҷикистон, бинои нави Телевизиони «Душанбе» ва Осорхонаи миллии Дастгоҳи иҷроияи Президенти Ҷумҳурии Тоҷикистон боздид ба амал оварданд. Форум бо сайри шоми пойтахт тавассути хатсайри сайёҳӣ ба анҷом расид.