​Бахшида ба ҷашни 35-солагии Истиқлоли давлатии Ҷумҳурии Тоҷикистон, 18 августи соли 2026 дар Боғи фарҳангию фароғатии ба номи Абуабдуллоҳи Рӯдакӣ бо ташаббуси Кумитаи иҷроияи марказии Ҳизби Халқии Демократии Тоҷикистон чорабинии бошукӯҳи идона таҳти унвони «Ҳизби Халқии Демократии Тоҷикистон – таҳкимбахши Истиқлоли давлатӣ ва таблиғгари ваҳдату ягонагӣ» баргузор гардид.

​Дар ин чорабинӣ аҳли санъату ҳунар бо барномаи рангини фарҳангӣ сокинон ва меҳмонони пойтахтро шод намуданд.

​Мавриди зикр аст, ки тибқи қарори маҷлиси Раёсати Кумитаи иҷроияи марказии ҲХДТ (аз 22 июли соли 2026, №4), бахшида ба 35-солагии Истиқлоли давлатӣ дар тамоми шаҳру ноҳияҳои кишвар силсилаи чорабиниҳои сиёсиву фарҳангӣ давом доранд.

​Муовини якуми Раиси Ҳизби Халқии Демократии Тоҷикистон Маликшо Неъматзода зимни сухани ифтитоҳӣ таъкид кард, ки ҲХДТ ҳамчун ҳизби созандаву бунёдкор дар таҳкими ғояҳои Истиқлол, ваҳдати миллӣ ва рушди устувори кишвар саҳми арзанда дорад. Ҳизб дар даврони соҳибистиқлолӣ бо барномаҳои ҳадафмандонаи худ пайваста дар роҳи пешрафти Тоҷикистон фаъолият менамояд.

​Ҳамчунин зикр гардид, ки неъмати бебаҳои Истиқлолу амоният ва сулҳу суботи комил бо талошҳои пайвастаи Пешвои миллат, Президенти Ҷумҳурии Тоҷикистон ва Раиси ҲХДТ муҳтарам Эмомалӣ Раҳмон ба даст омадаанд. Ин дастовардҳо ҳар як шаҳрвандро водор месозанд, ки барои ҳифзи ин доштаҳои бузурги миллӣ ва таҳкими пояҳои давлатдорӣ масъулияти бештар эҳсос намояд.

​Зинда бод Тоҷикистони соҳибистиқлол!

Ҷовидон бод сулҳу ваҳдат ва Истиқлоли давлатӣ