Бо мақсади иҷрои дастуру супоришҳои Раиси муаззами Ҳизби Халқии Демократии Тоҷикистон, Пешвои миллат, муҳтарам Эмомалӣ Раҳмон, бо ибтикори Кумитаи Иҷроияи Марказии Ҳизби Халқии Демократии Тоҷикистон ҷиҳати баланд бардоштани сатҳи тахассус, савияи дониши сиёсӣ, ҳуқуқӣ ва маънавии кормандони ҳизбӣ, инчунин мушаххас намудани самтҳои фаъолияти ташкилотҳои ҳизбӣ дар марҳилаи имрӯза, аз 12 то 18 апрели соли ҷорӣ курси бозомӯзӣ барои мудирони бахши ҷавонону занони кумитаҳои иҷроияи ҲХДТ дар шаҳру ноҳияҳои ҷумҳурӣ оғоз гардид.

Дар маросими ифтитоҳи курси омӯзишӣ муовини якуми Раиси ҲХДТ Маликшо Неъматзода, Ёрдамчии Президенти Ҷумҳурии Тоҷикистон оид ба масъалаҳои рушди иҷтимоӣ ва робита бо ҷомеа Сафарзода Анвар, Раиси Кумитаи кор бо занон ва оилаи назди Ҳукумати Ҷумҳурии Тоҷикистон Файзиддинзода Бунафша, Раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон Гулаҳмадзода Зулфиқор ва академики Академияи миллии илмҳои Тоҷикистон Кароматулло Олимов иштирок намуда, суханронӣ карданд.

Зимни суханрониҳо таъкид гардид, ки дар шароити кунунӣ таваҷҷуҳи хоссаи Пешвои миллат ба масъалаҳои баланд бардоштани сатҳи худшиносии миллӣ, тарбияи ҳисси ватандӯстӣ ва таҳкими пояҳои давлатдории миллӣ миёни ҷавонон ва занон аҳаммияти бузург дорад.

Ҳамчунин зикр шуд, ки дар замони ҷаҳонишавӣ ва тағйирёбии босуръати равандҳои сиёсиву иҷтимоӣ, нақши ҷавонон ва занон дар ҳифз ва таҳкими арзишҳои миллӣ, пойдории сулҳу субот ва таъмини рушди устувори ҷомеа ниҳоят муҳим мебошад.

Ҳадафи асосии баргузории курси омӯзишӣ баланд бардоштани сатҳи маърифати сиёсӣ ва ҳуқуқии мудирони бахши ҷавонону занон, таҳкими ҳисси худшиносиву худогоҳӣ, рушди малакаҳои роҳбарӣ ва ташаббускорӣ, инчунин ҷалби фаъоли ҷавонон ва занон ба ҳаёти ҷамъиятӣ ва сиёсӣ мебошад.

Дар баробари ин, курси омӯзишӣ ба густариши ҷаҳонбинӣ, баланд бардоштани масъулияти шаҳрвандӣ ва омода намудани кадрҳои соҳибмаърифат, ватандӯст ва содиқ ба арзишҳои миллӣ равона гардидааст.

Дар анҷоми курси омӯзишӣ иштирокчиён доир ба мавзуъҳои баррасишуда мубодилаи афкор намуда, омодагии худро ҷиҳати татбиқи донишҳои андӯхта дар фаъолияти минбаъда иброз доштанд.