Кӯдакони хушбахти диёр

2022-06-01

Хонае, ки тифл бошад, ғусса дар он хона нест,

Хонае, ки тифл бошад, ғайбати бегона нест.

Мон, ки аз ҳар хонадон ояд садои кӯдакон

Нархи ҳар як хандааш гӯйи ба сад дурдона нест.

Дар ҳақиқат кӯдак атои Парвардигор аст. Хонае, ки аз он ҷо садои кӯдак мебарояд, шодиву хуррамӣ ҳамеша танинандоз мегардад. Ғаму ғусса ва ташвишҳои рӯзгор ба як хандаи кӯдак намеарзад. Вақте шахс бо кӯдак муошират ва каме бозӣ мекунад, хастагии худро ҳис намекунад ва ба як олами тахайюлӣ ворид мешаваду айёмии кӯдакии хешро пеши назар меорад. Аз ин лиҳоз ояндаи мову шумо ва давлат аз тарбияи дурусти онҳо вобастагии калон дорад. Ҳамасола дар қаламрави Ҷумҳурии Тоҷикистони соҳибистиқлоламон 1-уми июн ҳамчун Рӯзи байналмилалии ҳифзи кӯдакон таҷлил мегардад.

Бори аввал соли 1950 бо қарори Анҷумани Шўрои федератсияи байналмилалии демократии занон Рўзи байналмилалии ҳифзи ҳуқуқи кӯдак таъсис ёфт ва аз ин хотир санаи 1-июн ҳамчун Иди кӯдакон дар қатори дигар ҷашнвораҳо қайд карда мешавад.

Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон, Раиси муаззами Ҳизби Халқии Демократии Тоҷикистон, муҳтарам Эмомалӣ Раҳмон нисбати кӯдакони ятим ва маъюбу танҳо таваҷҷуҳи хосса зоҳир мекунанд ва дар ҳар сафарҳояшон ба шаҳру навоҳии мамлакат таъкид медоранд, ки ин қишри ҷомеа дар мадди назари ҳамешагии давлату ҳукумат қарор доранд.

Бахшида ба ин муносибат Кумитаи иҷроияи Ҳизби Халқии Демократии Тоқикистон дар шаҳри Хуҷанд 65 нафар кӯдакони ятимро сарҷамъ намуда, барои болидахотирии онҳо сайругашт ва тамошои мавзеъҳои таърихию тамошобоби шаҳри Хуҷандро ташкил намуд, то ки дар қалби эшон меҳри Ватанро ҷой намуда, онҳоро ба ватандӯстию меҳанпарастӣ ва хештаншиносӣ ҳидоят намояд.

Дар чорабинии мазкур Раиси Кумитаи иҷроияи Ҳизби Халқии Демократии Тоҷикистон дар вилояти Суғд Исмоилзода Зуфар Муртазохон ва Раиси кумиҷроияи шаҳри Хуҷанд Маликисломӣ Наим Мунаввар ширкат варзида, кӯдаконро табрику муборакбод намуданд. Бо роҳбарии аъзои фаъоли ТҶҶ “Созандагони Ватан” кӯдакон аз мавеъҳои хиёбони Абӯабдуллоҳи Рӯдакӣ, майдони Парчами давлатӣ, Варзишгоҳи 20-солагии Истиқлолият ва Қасри таърихии Арбоб дидан намуданд. Ҳамзамон аз тарафи кумиҷроияи шаҳрӣ барои кӯдакон дастархони идона ороста шуд.

Дар ҳақиқат Пешвои миллат ба ятимону бепарасторон ғамхорӣ зоҳир намуда, ҳамасола тибқи дастуру супоришҳои Сарвари давлат, муҳтарам Эмомалӣ Раҳмон дар доираи баргузории чорабиниҳо бахшида ба Рӯзи ҳифзи кӯдакон нисбати ин қишри ҷомеа ғамхориҳо зоҳир карда мешавад.

Дар ҷамъбасти чорабинӣ ба ҳар яки онҳо туҳфаҳои хотиравӣ супорида шуд.